Белгилүү орусиялык балет бийчиси Анастасия Волочкова жарыялаган калпакчан айдоочусунун сүрөтү интернетте кызуу талкуу жаратты

Орусиялык белгилүү балет бийчиси Анастасия Волочкова ак калпакчан айдоочусунун сүрөтүн өзүнүн Инстаграмдагы баракчасына жарыялады.

Сүрөттө Волочкова айдоочусу менен Mercedes S-Class унаасынын жанына туруп түшкөн. Андагы айдоочу башына ак калпак кийип турганын көрүүгө болот. Волочкова сүрөттү жарыялап, алдына: "Бул менин жаңы айдоочум. Сиздердин жашооңуздар да меникиндей күтүүсүз окуяларга бай болушун каалайм!" - деп жазган.

Бул сүрөттү интернет колдонуучулар кызуу талкууга алышкан. Анда көпчүлүк айдоочуга ийгилик каалап, ал кыргыз улутундагы адам экенин айтышса, айрымдары көптөгөн чуулгандуу окуялардын чордонунда жүргөн Волочкова айдоочуну дагы бир ишке аралаштырып коюшу мүмкүн экендигин жана анын айдоочусу болуп иштебей эле койгону оң болорун жазышкан.