Актриса Назира Мамбетова: "Министр үйүм жок деп даттана бербеңиз деди"

Кыргыз Республикасынын Эл артисти Назира Мамбетовага Маданият, маалымат жана туризм министри Султан Жумагулов "үйүм жок деп даттана бербеңиз" деп айтканын SUPER.KG порталына билдирди.

"Буга чейин Жогорку Кеңештин депутаттары, журналисттер, эл, көрүүчүлөр, 70 жашка чыккыча батирде жашайсыз деп, мендеги үй маселесин айтып чыгышкан. Ошол сөздөр министрге катуу тийген окшойт. Мен жумуштарым менен министрликке барсам, жолугуп "үйүм жок деп даттана бербеңиз" деди. Мен 70 жашка чыкканга чейин бул боюнча эч жерге даттанган эмесмин. Даттанып жашаганды жаман көрөм. Сиздин атыңызды эч жерде атаган эмесмин. Сиз жумушка жаңы келдиңиз, сизде акча жок, үй да жок дедим", - дейт актриса.

Бул боюнча аталган министрликтин басма сөз кызматы төмөндөгүдөй жооп берди.

"Министр азыр эч кимге үй бербейбиз деп айта элек. Маданият тармагында эмгектенгендер үчүн үй салуу демилгеси көтөрүлүп, учурда ал үйдүн капсуласы салынган боюнча турат. Кимге үй берилет аны комиссия карап чыгат. Бирок Назира Мамбетова үй алчулардын алдыңкы катарында. Анын маданиятка кошкон салымын эске алуу менен министр өзү көзөмөлгө алган", - деди басма сөз кызматы.

Белгилей кетсек, актриса Оштогу театрда 22 жыл иштеп, борборго 1994-жылы көчүп келген. Ошондон ушул күнгө чейин уул-келини, неберелери менен бирөөнүн үйүндө убактылуу жашап келерин айткан. Ушул жылдын 15-февралында депутат Ирина Карамушкина актрисага батир берүү сунушун Жогорку Кеңештин жыйынында айтып чыккан.