Багдаддагы абакта Кыргыз мамлекетинен 3 аял жатат деген маалымат боюнча ТИМ Иракка Нота жолдоду

Кыргыз Республикасынын Кувейт Республикасындагы элчилиги тарабынан Ирактын Кувейттеги элчилигинин консулу менен жолугушуу өткөрүлдү. Мындай маалыматты Кыргыздын Тышкы иштер министрлиги кабарлады.

Маалыматка ылайык, 8-март күнү өткөн жолугушууда Кыргыз тарап консулга Ирак өлкөсүнө жолдогон Нотаны берип, Багдаддагы абакта 3 Кыргыз аялдары жатат деген маалыматтарды тастыктап берүүгө көмөк көрсөтүүсүн өтүндү.

"Ошондой эле жолугушууда Кыргыз мамлекетинин 3 жараны делген аялдардын жанында жашы жете элек 10 бала бар деген маалыматтар да жеткирилип, соттук териштирүү иштери жүрүп жатканда чет элдик жарандардын укугун коргоого жактоочунун кызматтарын пайдаланууга мүмкүнчүлүк берилишин өтүндү.

Учурда Кыргыз өлкөсү Иракка жолдонгон Нотанын жообун күтүп жатат. Мындан тышкары Кыргыздын Кувейттеги өкүлчүлүгү тарабынан "Кызыл-крест" коомунун эл аралык комитетинин Эль-Кувейт шаарында жайгашкан Аймактык миссиясынын дарегине да бул тууралуу кат жолдонду", - деп жазылат маалыматта.