Өзбекстан менен Тажикстандын президенттери 2 өлкөнүн жарандарына 1 айга визасыз жүрүүгө уруксат берген макулдашууга кол коюшту

Өзбекстандын президенти Шавкат Мирзийоев менен Тажикстандын президенти Эмомали Рахмон эки өлкөнүн жарандары үчүн 30 күн визасыз жүрүүгө уруксат берген макулдашууга кол коюшту. Бул тууралуу чет элдик басылмалар жазып чыгышты.

Маалыматка караганда, мамлекет башчылардын жолугушуусунда жалпы 27 документке кол коюлган, алардын негизгилери болуп чек аралардагы өткөрмө пункттарды жандандыруу жана Ташкент менен Дүйшөмбү каттамдарын ачуу келишимдери.

Ошондой эле сүйлөшүү учурунда 2017-жылы эки өлкөнүн ортосунда 240 миллион долларлык соода алакасы болгонун, бул сумманы келерки жылы эки эсеге көтөрүү пландалды. Өзбек президенти Тажикстандын Рогун ГЭСин курууга да катышып калуусу мүмкүн экенин билдирсе, тажик президенти тажик-өзбек мамлекеттери ортосунда тарыхый келишимдер жетишилгенин белгиледи.

Өзбекстандын президенти Шавкат Мирзийоев Тажикстанга эки күндүк иш сапары менен 9-мартта барган.