Бишкекте 1 тоннадан ашык беш бармак менен 110 метрлик чучук элге таратылууда

Борбор калаадагы "Аю гранд комфорт" соода борборунун алдында азыркы тапта "Гиннесстин рекорддор китебине" кирүү үчүн даярдалган 1 тонна беш бармак менен 110 метрлик чучук келген элге таратылууда. Бул үчүн 8 жылкы союлгандыгы маалымдалган.

Учурда соода борборунун алдына топтолгон шаар тургундарынын саны көп. Бирок казандар орнотулган тарапка келген эл өтө албай тургандай тосмолор орнотулган. Элге бериле турган беш бармак тосмонун сыртында чараларга салынып турат. Уюштуруучулар аны келгендерге боорсок менен кошо ооз тийгизишүүдө.

Буга чейин социалдык тармактардын айрым колдонуучулары шаар тургундарын ал жерде маданияттуулукту, сабырдуулукту сактоого чакырып жатышкан. Кээ бирлери ошол жерде ызы-чуу чыгып, уят болбосок экен деген чочулоолорун билгизишкен. Учурда өтө жаман көрүнүштөр болгон жок. Бирок көпчүлүктүн арасынан баштыгын сууруп чыгып, тамак, чучук таратып жаткандардын табагына кол салып жибергендер бар. Ошол эле учурда атайын келип ооз тийбей кетип, нааразы болгондордун да саны көп.

Ал эми даярдалган чучуктун узундугу 117 метрге жетет деген да маалыматтар бар. Беш бармак 2 тонна салмакка чейинки жүктү өлчөй ала турган атайын сатып алынган таразага тартылган. Анда анын салмагы 1 тонна 464 килограммды түзгөн.