Кыргыз Эл артисти Ашыр Чокубаев 71 жашында дүйнө салды

Бүгүн, 11-мартта Кыргыз Эл артисти Ашыр Чокубаев дүйнө салды. Кинематографисттер департаментинен билдиргендей, актёр узакка созулган оорудан улам каза болду.

Ашыр Чокубаев 1947-жылы Өзгөн районуна караштуу Көлдүк айылында жарык дүйнөгө келген. Атасы кыргыздын белгилүү артисти Назарбек Чокубаев театрда эмгектенген. Апасы Турсун Чокубаева да театрда актриса болуп иштеген.

Ашыр Чокубаев №6, №9-орто мектептеринде билим алган. Мектепти аяктаган соң Москва шаарындагы Бүт­күл Союздук кино тармагы боюнча институтун аяктаган. Жогорку билимге ээ болгондон кийин Кыргыз драма театрынын башкы режиссёрунун чакыруусу менен ошол театрда иштеп калган.

Театр жана кино актёру “Кожожаш”, "Курманжан датка", "Ак илбирстин тукуму" жана башка фильмдерде роль жараткан. Ал гана эмес, коңшу казак элинин бир далай тасмаларына түшүүгө жетишкен. Буга белгилүү “Көчмөндөр”, "Баатыр баяны", "Талаадагы куушмак" жана башка фильмдери далил боло алат.

Кошумчалай кетсек, Ашыр Чокубаевдин иниси Эдилбек Чокубаев дагы кино тармагында актёр, каскадёр катары таанымал. Анын Сайкал жана Саадат аттуу эки кызы бар. Тун кызы Сайкал Чокубаева Аскар Акаевдин уулу Айдар Акаевге турмушка чыгып, кийин ажырашып кетишкен.

SUPER.KG порталынын эмгек жамааты Ашыр Чокубаевдин көз жумганына байланыштуу үй-бүлөсүнүн, жакындарынын аза кайгысын тең бөлүшүп, терең кайгыруу менен көңүл айтат.