Өзбекстанда жаңы төрөлгөн ымыркайдын өлүмүнө шектелип 17 жаштагы студент кыз кармалды

Өзбекстандын Сурхан-Дарыя облусунун Кизирик районунда ымыркайды өлтүрүүгө шектүү катары 17 жаштагы кыз кармалды. Бул тууралуу чет элдик басылмалар жазып чыгышты.

Маалыматка караганда, ымыркайдын жансыз денеси 7-март күнү аймактагы балык чарбаларына тиешелүү көлмөнүн жээгинен табылган. Бул иш боюнча кылмыш иши козголуп, кылмышка шектүү катары 17 жаштагы педагогикалык колледждин студенти колго түшүрүлгөн.

Ошол аймактагы активисттердин бири, студент кыз өз алдынча төрөгөн соң ымыркайын тумчуктуруп өлтүрүп, көлмөнүн жээгине алып барып таштап койгонун айткан. Ошондой эле кыздын атасы учурда Орусияда эмгектенерин, кыз эркин өсүп, өз билгенин жасап калганын билдирген.