Бишкек ШИИББи: "Таңга жуук көп кабаттуу үйдөн кулаган кыз акыркы убакта кыйналып, жашагысы келбей жүргөн"

Көп кабаттуу үйдүн терезесинен кулаган кыздын акыркы кездерде жашагысы келбей жүргөн. Бул тууралуу SUPER.KG порталына Бишкек шаардык ички иштер башкы башкармалыгынын басма сөз кызматы билдирди.

"10-март күнү саат 05:30 чамасында Манас проспектисиндеги көп кабаттуу үйлөрдүн биринен 20-25 жаштагы кыз боюн таштап жибергени тууралуу маалымат келип түшкөн. Ыкчам тергөө тобу барганда 1991-жылы туулган Н.Б. аттуу жаран 8-кабаттан өзүн таштап жибергени белгилүү болгон. Туугандарынын айтымында, ал кыздын акыркы мезгилдерде жашагысы келбей, кыйналып жүргөн. Учурда иликтөө иштери уланып жатат", - деп билдирет басма сөз кызматы.

Эске салсак, 10-март күнү таңга жуук Бишкектеги көп кабаттуу үйдүн подъездинде аялдын жансыз денеси жаткандыгы тууралуу маалымат адегенде "Тез жардам" кызматына түшкөн. Чакыруу болгон жерге келген медицина кызматкерлери анын каза болуп калганын аныктап, денени милиция кызматкерлерине өткөрүп беришкен.