Дамирбек Сагынбаев Коопсуздук кеңешинин катчысы болуп дайындалды

Дамир Сагынбаев Коопсуздук кеңешинин катчысы болуп дайындалды. Бул тууралуу бүгүн, 12-мартта президенттик аппараттын басма сөз кызматы билдирди.

Маалыматка ылайык, тийиштүү жарлыкка президент Сооронбай Жээнбеков кол койду.

Буга чейин бул кызматты Алмазбек Курманалиев аркалап келген. Ал өз арызынын негизинде 2017-жылдын 18-декабрында кызматынан бошотулган.

Сагынбаев 1974-жылы Токмок шаарында туулган. Ал 1995-жылы ИИМдин Бишкек жогорку мектебинин юрист-укук таануу боюнча адистигин аяктаган.

Эмгек жолу:

1995-1996-жылдары Токмок шаарынын ички иштер башкармалыгынын тергөө бөлүмүнүн тергөөчүсү;

1996-1999-жылдары Орусия ИИМинин башкаруу академиясынын адъюнкту;

1999-2002-жылдары ИИМ академиясынын доценти;

2002-2004-жылдары ИИМдин илимий-изилдөө борборунун башчысынын орун басары;

2004-2009-жылдары президенттик аппараттын коргоо жана коопсуздук бөлүмүнүн эксперти;

2009-2010-жылдары коргоо жана коопсуздук маселеси боюнча президенттин мамлекеттик кеңешчисинин кызматынын инспектору;

2010-жылы Убактылуу өкмөттүн коргоо жана коопсуздук бөлүмүнүн инспектору;

2010-2013-жылдары өкмөттүн алдындагы Баңгизаттарды көзөмөлдөө боюнча мамлекеттик кызматынын төрагасынын орун басары;

2013-2014-жылдары өкмөттүк аппараттын коргоо, укуктук тартип жана өзгөчө кырдаалдар бөлүмүнүн инспектору;

2014-2017-жылдары өкмөттүк аппараттын коргоо, укуктук тартип жана өзгөчө кырдаалдар бөлүмүнүн жетекчиси;

2017-жылдын декабрь айынан тарта Коопсуздук кеңешинин биринчи орун басары болуп иштеп келген.