Ошто "Йакын Инкар" тобунун 9 мүчөсү эркинен ажыратылды

Ош облусунун аймагында "Йакын Инкар" тобунун 16 мүчөсү кармалып, Ош шаардык сотунун чечими менен анын 9у эркинен ажыратылды. Бул тууралуу ИИМдин маалымат кызматынан кабарлашты.

Маалым болгондой, 9 жаран Кыргыз Республикасынын Кылмыш-жаза кодексинин 299-беренесинин 2-3-бөлүктөрүндөгү кылмыш белгилери боюнча 3 жана 4 жылга эркинен ажыратылып, жазасын күчөтүлгөн тартипте түзөтүү абагында өтөө үчүн сот залынан камакка алынды.

Бул жарандар 2017-жылдын 15-июнунда "Йакын Инкар" агымынын мүчөлөрү катары Кара-Суу районунда Ош облустук ички иштер башкармалыгынын кызматкерлери тарабынан кармалган.
Мындан сырткары 7 жаранга карата тергөө иштери жүргүзүлүүдө. Алардын алтоо Араван районунан, бирөө Өзгөн районунан кармалган.

"Йакын Инкар" - "дааватчылар" деген ат менен белгилүү "Таблиги жамаат" уюмунан бөлүнүп чыккан өзүнчө топ.