Иса Өмүркулов: "Жөлөк пулга муктаж болгон үй-бүлөлөр ушул убакытка чейин аныкталбай жатат"

"Жөлөк пулга муктаж болгон үй-бүлөлөр ушул убакытка чейин аныкталбай жатат", - деп бүгүн, 13-мартта парламенттин тийиштүү комитет жыйынында КСДП фракциясынын лидери Иса Өмүркулов билдирди.

Иса Өмүркуловдун айтымында, муктаж үй-бүлөлөрдү аныктоо чоң көйгөй. "Бул көйгөй көп жылдан бери чечилбей келет. Бүгүнкү күнү Эмгек жана социалдык өнүктүрүү министрлигинде канча адам иштейт? Жер-жерлерде министрликтин кызматкерлери барбы?" - деди Өмүркулов.

Эмгек жана социалдык өнүктүрүү министри Таалайгүл Исакунова министрликте болжол менен 2 миңдей адам иштей турганын айтып, так канча кызматкер иштей турганын унутуп калганын билдирди.

Ошону менен катар эле депутат министрлик жылына республикалык бюджеттен канча каражат ала турганын сурады.

Министр бул суроого дагы так жооп бере алган жок.

Өмүркулов Исакуновага: "Айыл өкмөт башчыларына чалып жөлөк пулга канча адам муктаж экенин сурайсыңар. Анын 10 таанышы болсо ошону кошот. Кызматкерлер дагы 10 таанышын кошуп, чынында жөлөк пулга муктаж болгондор алышпай калат", - деп кайрылды.