Бишкекте ырчы Самара Каримова баш каармандын ролун аткарган "Илегилек" спектакли эл сынына коюлду

Кечээ, 13-мартта Токтоболот Абдумомунов атындагы кыргыз драма театрында Кыргыз эл жазуучусу Султан Раевдин калемине таандык “Илегилек” драмасы коюлду. Аталган драманы Ош драма театрынын актёрлору ойноп, башкы ролду Кыргыз Республикасынын Эмгек сиңирген артисти Самара Каримова аткарды. Билет баасы 500 сомду түзгөн спектаклге келген көрүүчүлөр залдын 100 пайызын түзүп, айрымдары туруп көрүштү. Бир саатка созулган драманын соңунда көрүүчүлөр ордунан туруп, 5 мүнөт тынбай кол чабышты.

“Илегилек” спектакли - улуу муун менен жаш муундун көз караштары, баалуулуктарынын кагылышы тууралуу баяндаган драма" деди драматург Султан Раев.

Жыйынтыгында Кыргыз Республикасынын Эл артисти Жамал Сейдакматова сахнага чыгып сөз сүйлөдү. Анда актриса Ош драма театрынын актёрлорун спектаклди ийгиликтүү өткөрүшү менен куттуктады. Башкы ролду ойногон Самара Каримова спектаклдин ачылышы өзгөчө болгонун белгилеп өттү.

Белгилей кетсек, 15-16-17-февралда “Илегилек” драмасы Ош шаарында коюлган. Үч күн катары менен коюлган спектакль аншлаг менен өткөн. Билет баасы алдыңкы катарга 750 сомду түзсө, арткы орундар 200 сомдон сатылган.