Депутат Момбеков: "Экс-президент Роза Отунбаева 5 миң сомго жетпеген акча менен пенсияга чыккан"

"Пенсия боюнча мыйзамдарды өзгөртүп жатабыз, бирок көлөмүн өзгөртө албайбыз", - деп бүгүн, 14-мартта парламент жыйынында КСДП фракциясынан депутат Рыскелди Момбеков билдирди.

Анын айтымында, депутаттар шайлоочулар менен жолукканда пенсия жөнүндө маселени көп көтөрүшөт. Ал билдиргендей, пенсия берүүдө теңсиздик болуп жатат.

"40 жыл мугалим болуп иштеген жаран 10 миң сом пенсия алса, анын 18 жыл иштеген баласы 20 миң сом алат. Экс-президент Роза Отунбаева канча сом менен пенсияга чыккан?" - деп депутат Социалдык фонддун төрагасы Теңизбек Абжапаровго суроо берди.

Абжапаровдун айтымында, президенттин айлыгы канча болсо, ошол сумманын 70 пайызы менен пенсияга чыгат.

Рыскелди Момбеков Роза Отунбаева 5 миң сомго жетпеген акча менен пенсияга чыкканын белгиледи. "Президент 5 миң сомго жетпеген акча менен пенсияга чыгып жатса, прокуратурада иштеген генералдар 90 миң сом менен пенсияга чыгып жатат", - деди эл өкүлү.