Депутат Бишкек-Ош жолунун кар көчкү түшкөн аймагында жолду тазалоодо бир эле техника иштеп жатканын айтты

Бүгүн, 14-мартта Жогорку Кеңештин жыйынында депутат Исхак Пирматов Бишкек-Ош жолунун кар көчкү түшкөн аймагында жолду тазалоодо бир эле техника иштеп жатканын айтты. Эл өкүлү өкмөттүн өкүлүнө жана төрага Дастан Жумабековго кайрылып, бул маселеге көңүл бурууга чакырды.

"Азыр мага WhatsApp аркылуу видео-сүрөттөрүн да жиберип жатышат. Бишкек-Ош жолундагы кар көчкү түшүп жабылып калган жерде болгону бир техника иштеп жатыптыр. Жүргүнчүлөрдүн баары нааразы болуп жатат. Буга көңүл бурсаңыздар, техникаларды тартуу керек", - деди Пирматов.

Төрага Дастан Жумабеков бул багытта тийиштүү тапшырмалар берилип, көңүл бурулуп жатканын айтып, депутатка жооп берди.

Белгилей кетсек, 13-мартта саат 22:40 чамасында Бишкек-Ош унаа жолунун Чычкан капчыгайы аркылуу өткөн бөлүгүндө кар көчкү түшүп, каттам жабылган. Маалыматтарга караганда, кар көчкүнүн көлөмү 2 миллион 500 миң метр кубду түзсө, бийиктиги 50 метрге, узундугу 250 метрге жетет.