Бир консультантка 5 миллион доллар... ЖЭБди жаңылоодогу 386 миллион доллар эмнеге коротулган? (тизме)

Бишкек Жылуулук электр борборун модернизациялоого кандай баада эмнелер сатып алынганы белгилүү болду. SUPER.KG'нин карамагына түшкөн документте 600 долларлык кычкачтан башка да кызыктуу жагдайлар табылды. Бул документ 2017-жылы бекитилгенин, ага кытайлык ТВЕА компаниясынын Кыргыз Республикасындагы өкүлү Мусажан Макелек кол койгонун жана мөөр басканын көрсө болот.

Документте 386 миллион долларга конкреттүү түрдө канча жабдуу кандай баада сатып алынганы, тейлөөгө канча сумма каралганы көрсөтүлүүдө. Чоң каражат сарпталган учурларды иргей турган болсок:

турбина - 46 миллион 893 миң доллар;

башкы корпус - 40 миллион 261 миң доллар;

эки от казан - 41,4 миллион доллар (ар бири 20,7 миллион доллардан);

кабель жана кабелдик курулуштар - 20 миллион 299 миң доллар;

жылуулукту көзөмөлдөө системи - 19 миллион 400 миң доллар;

күкүрттү жок кылуу системи - 19 миллион 173 миң доллар;

сууну кайра иштетүү системи - 9 миллион 571 миң доллар.

Ошондой эле "башка чыгашалар" деген бөлүк боюнча 49 миллион 647 миң доллар жумшалган. Анын ичинде административдик чыгашага эле 14 миллион 443 миң доллар бөлүнсө, бир консультанттын кызматы үчүн эле 5 миллион 937 миң доллар каралган.

Мындан тышкары документтеги тизмеде төмөндөгү коротуулар да көңүл бурдурат. Мисалы:

Видеобайкоо - 1 миллион 738 миң доллар (анын ичинде 128 камерага 38 миң 400 доллар, 5 видеорегистраторго 2 миң доллар каралган);

Өрт сигнализациясы - 220 миң 559 доллар (жалпы өрткө каршы системине 1 миллион 184 миң доллар каралган);

Айлана-чөйрөнү коргоо - 583 миң 847 доллар (анын ичинде ЖЭБдин аймагын жашылдандырууга 20 миң доллар каралган).

Айта кетсек, Бишкек ЖЭБин жаӊылоо үчүн Кытайдан 386 миллион доллар карызга алынган. Бул акча кантип жумшалары боюнча Эсептөө палатасы 2015-жылы ЖЭБ карамагына кирген “Улуттук электр станциялары” ишканасына карата аудит жүргүзгөн. Мисалы, жабдуулар үчүн 164 миллион 600 доллар, курулуш иштерине 66 миллион 700 миӊ доллар, монтаж иштерине 64 миллион 200 миӊ доллар жумшалары көрсөтүлгөн. Ал эми кызматкерлерди жана техникаларды жеткирүүгө 12 миллион 400 миӊ доллар коротулары көрсөтүлүп, бирок бул акчага конкреттүү эмне иштер жасалары айтылган эмес.