Президенттикке талапкер Ксения Собчак дебат учурунда көзүнө жаш алып, студиядан чыгып кетти

Орусиянын президенттигине талапкер Ксения Собчак "Россия 1" телеканалындагы дебат учурунда көзүнө жаш алып, студиядан чыгып кетүүгө аргасыз болду. Бул тууралуу орус басылмалары жазып чыгышты.

Маалым болгондой, Собчак шайлоочуларга кайрылуу учурунда башка талапкерлер анын сөзүн улам сайын бөлүп жатышканын байкаган. Мындан улам ал "Булар менин гана сөзүмдү бөлүп жатышат" деп, алып баруучудан убакыт талап кылган. Андан соң дагы бир атаандашы Владимир Жириновский ага сөз бербегени аз келгенсип, дайыма басынта турганын билдирип, мындайга жол берип жатканы үчүн алып баруучуну айыптаган.

Дал ушул учурда Жириновский Собчакка карап, "Бул кызды бала бакчага алып барып койгула. Балким, ошол жактан акылына келет", - деп кыйкырган.

Берүүнүн алып баруучусу Владимир Соловьёв бардык талапкерлер биригип, бир адамга асылып, аны көз жашка чейин жеткирүүнүн өзү акылга сыйбаган көрүнүш экендигин айтып, эфирди жыйынтыктап жатканда көзүнө жаш алган Собчак студиядан чыгып кеткен.