Кочкор-Ата шаарында лицейдин директору пара алып жаткан жеринен кармалды

Жалал-Абад облусунун Ноокен районунун Кочкор-Ата шаарында лицейдин директору пара алып жаткан жеринен кармалды. Бул туурасында Экономикалык кылмыштуулукка каршы күрөшүү боюнча мамлекеттик кызматынан билдиришти.

Маалыматка ылайык, №77-лицейдин директору 19 миң 400 сом пара алып жаткан жеринен кармалган.

"Тергөө иштеринин натыйжасында аталган лицей 2018-жылдын февраль айында азык-түлүк жеткирүү кызматы боюнча тендер жарыялаган. Аны жеке ишкер Ч.А. аттуу жаран жеңип, келишим түзгөн. Келишимге ылайык, жеке ишкердин эсебине ай сайын аткарылган жумушу үчүн 20 миң сомдон ашык акча которулуп турушу керек болгон. Бирок лицейдин директору Ч.А.дан төлөнүүчү акча каражатынын 90 пайызын берүүнү жана алынып келген азык-түлүктүн тизмеси жазылган баракка кол жана мөөр коюуну талап кылган", - деп жазылат маалыматта.

Аталган факты боюнча Кылмыш-жаза кодексинин 313-беренеси (опузалап пара талап кылуу) жана 304-беренеси (кызматтык абалынан кыянаттык менен пайдалануу) менен кылмыш иши козголду. Кармалган жаран Жалал-Абад ШИИБинин убактылуу кармоочу жайына 2 айга камакка алынып, тергөө иштери башталды.