Тагдырбы же дал келүүбү? Кытайлык жубайлар таанышканга чейин 11 жыл мурун чогуу түшкөн сүрөттөрү бар экенин билишти

Кытайдын Чэнду шаарында күйөөсү Е жубайы Сюэ менен таанышканга чейин 11 жыл мурун чогуу түшкөн сүрөтү бар экенин билген. Бул тууралуу кытай басылмалары жазып чыгышты.

Маалым болгондой, анда экөө тең бир убакытта саякатка чыгышкан. Тактап айтканда, ушул жылдын март айынын башында Е эгиз кыздары кимге көбүрөөк окшош экендигин билүү үчүн жубайынын кичинекей кезиндеги сүрөттөрүн көрүп отуруп, бир сүрөткө көзү түшкөн. Анда жубайынын артында көк футболка кийген бала турган. Ал өзү болчу.

Белгилүү болгондой, сүрөт 2000-жылдын июль айында тартылган. Анда Сюэ апасы менен Циндао шаарына саякаттоону чечкен. Дал ошол убакытта Е дагы аталган жерге саякатка чыккан. Е менен Сюэ бир учурда Циндаодогу "Төртүнчү Май" аталышындагы аянттан сүрөткө түшүшкөн. Ал гана эмес, күйөөсү өзү сүрөткө түшүп жаткан учурда болочок жубайынын сүрөтүндө да кадрга илинип калган.

Жубайлар андан 11 жыл өткөн соң гана таанышып, 2012-жылы баш кошушкан.