Кыргыз жарандарына Сербияга визасыз барууга жол ачылат

Кыргыз жарандарына Сербияга визасыз барууга жол ачылат. Эки өлкөнүн ортосундагы мындай келишимди бүгүн, 15-мартта Жогорку Кеңеш биринчи окууда карады. Жогорку Кеңештин Эл аралык иштер, коргоо жана коопсуздук боюнча комитетинин төрагасы Исхак Пирматов эки тараптуу келишим күчүнө киргенден кийин, Кыргыз жарандарына визасы жок 90 күнгө аталган өлкөгө барып келүүсүнө мүмкүн болорун айтты.

"Бул макулдашуу менен Кыргыз өлкөсүнүн жана Сербиянын паспортторуна ээ болгон жарандарга өз ара сапарларын эки өлкөнүн аймагында болуу жана транзит менен өтүүдө виза алуу талаптарын токсон күндөн ашпаган мөөнөткө бошотуу аркылуу жеңилдетет. Эки тараптуу келишим туризм, соода-экономикалык мамилелерди андан ары өнүктүрүүнү шарттайт", - деди Пирматов.

Келишим биринчи окууда добуш берүүгө жиберилди.

Ушундай эле эки тараптуу келишим Чили өкмөтү менен да түзүлүүдө. Келишим шарттарына ылайык, жарандар бул өлкөлөрдүн аймактарында визасыз эле 90 күнгө чейин жүрө алышат.