Өлкөгө келген туристтерге 20 долларга чейин бажы төлөмүн киргизүү сунушталды

15-мартта Жогорку Кеңеште салыктык эмес кирешелер боюнча мыйзам долбоору каралууда. Анда депутат Сайдулла Нышанов өлкөгө келген туристтерге 20 долларга чейин бажы төлөмүн киргизүүнү сунуштады.

"Жылдан жылга туристтердин келиши көбөйүп жатат. Ошондуктан ар бир келген туристтерден 10 доллардан 20 долларга чейин бажы төлөмүн киргизип койсок. Бул сырттан келген туристтер үчүн болбогон акча. Биз деле Дубайга барганда аэропорттон эле 40-50 доллар бажы төлөмүн алып калат. Менимче бизге төлөгөнгө ыңгайлуу кылып, ошондой төгүм киргизип койсок болот", - деди Нышанов.

Каржы министри Адылбек Касымалиев бул сунушту кылдат иликтеп чыгуу зарылдыгын айтты.

"Мен бул боюнча азыр жооп бергенден алысмын. Анткени аны иликтеп чыгуу керек. Бул туристтердин келишине таасир берип калышы мүмкүн. Ошондуктан тактап көрөлү", - деди Касымалиев.