Кыргыз мамлекети менен Өзбекстанды байланыштырган автобустук төрт каттам ачылат

Кыргыз мамлекети менен Өзбекстандын ортосунда эл аралык автобустук төрт каттамды ишке киргизүү маселеси иштелип чыгууда. Бул тууралуу өзбекстандык маалымат каражаттары жазууда.

Ага ылайык, эки өлкөнүн бул боюнча тиешелүү тараптары жүргүзүп жаткан сүйлөшүүлөрү аяктоо алдында турат.

"Жакын арада Ташкент-Бишкек-Ташкент, Фергана-Ош-Фергана, Анжиян-Ош-Анжиян каттамы боюнча автобустар жүрө баштайт. Жай мезгилинде Ташкент-Ысык-Көл-Ташкент багыты боюнча да автобус жүргүзүү мерчемделүүдө", - деген Өзбекстандын автомобилдик транспорт агенттигинин жетекчисинин орун басары Шаалим Шавахабов.

Маалыматта жазылгандай, эксперттер эки өлкөнүн калкы үчүн автобустук каттам эң зарыл болуп турганын айтышат. Бул Ош облусунда көптөгөн этникалык өзбектердин жашагандыгы менен да байланыштуу.

"Буга чейин Кыргыз тарап эки өлкөнү байланыштырып турган чек ара көзөмөл өткөрүү бекетинен күнүнө кирип-чыккандардын саны 12 миң адамга жеткенин маалымдаган. Чек арачылар нормалдуу режимде иштеп, 7 миң адамды өткөрө алышат. Буга байланыштуу "Достук" чек ара өткөрүү бекетиндеги кабиналарды кеңейтүү зарылдыгы да каралууда", - деп жазылат маалыматта.