Манжаларга пирсинг жасоо модага айланууда

Сулуулук дүйнөсү коомчулукту таң калтырууну улантат. Буга чейин көптөгөн кыздар мурунга же тилге пирсинг жасап келишсе, бул ирет манжаларга пирсинг жасоо жылдын мода тренддеринин катарына кошулууда. Чынында кыздардын мындай жоруктары интернет колдонуучуларынын арасында ар кандай талкууга алынып, көптөр бул көрүнүштү обужоктук катары сынга алышкан.

Пирсинг боюнча профессионал адис Адриан Кастильонун чет элдик басылмаларга берген маегине таянсак, мындай пирсингди көптөр аты жок манжасына жасатышат. Анын себебин түгөйүнө сүйүүсүн далилдөө же түгөйү бар экендигин билдирүү катары түшүнсө болот. Бирок мунун кооздугу эле болбосо, ден соолукка зыяны тийиши толук мүмкүн.

"Манжага пирсинг жасатуу кооптуу. Анткени колдорубуз көп кыймыл-аракетте болот. Кокусунан бир нерсеге илинип кетчү болсо, тери сыйрылып ден соолукка зыяны тиет", - деген ал.

Ошондой эле мындай пирсинг теринин, нерв системинин начарлап, кан-тамырлардын бузулушуна алып келе турганын кошумчалап, мода сүйүүчүлөрүнө бул ыкманы колдонууну сунуштабай тургандыгын билдирген.