Бишкекте Орусиянын элчилигинин алдында жүздөгөн шайлоочу келип, узак кезек күтүүсү жаралды (фото)

Бүгүн, 18-мартта Орусиянын президентин шайлоо өтүүдө. Кыргыз Республикасында жашаган Орусия жарандары үчүн 6 шайлоо тилкеси ачылган. Алардын биринде, тагыраагы, Бишкектеги элчиликтин алдында жүздөгөн шайлоочу узак кезек күтүүдө.

Дипломатиялык мекеменин басма сөз кызматы SUPER.KG порталына билдиргендей, Кыргыз жергесинде шайлоо эч кандай тоскоолдуксуз өтүүдө. "Көп шайлоочулардын катышуусу күтүлүүдө. 2012-жылдагы буга чейинки президенттик шайлоодогу тажрыйбаны эске алганда, республика боюнча 12 миңге чукул шайлоочу катышкан. Быйыл биз ушундай же мындан көп шайлоочулардын катышуусун күтүп жатабыз. Саат 12:00гө карата Бишкекте 1 515, Ошто 990, Кантта 1144, Караколдо 328, Кара-Балтада 510, Чолпон-Атада 147 добуш берилди", - дешти элчиликтен.

Айта кетсек, бүгүн президенттик шайлоодо жалпысынан дээрлик 111 миллион Орусия жараны добуш беришмекчи. Алар үчүн дүйнө боюнча 43 миң 271 шайлоо тилкеси иштеп жатат. Кыргыз жеринде добуш берүү үчүн шайлоо тилкелери Бишкек, Ош, Кант, Каракол, Кара-Балта жана Чолпон-Ата шаарларында жайгашкан. Ага ылайык, Орусиянын жарандары бул шаарларга барып добуш бере алышат.

Президенттик шайлоодо 8 талапкер ат салышууда. Алар:

1. Сергей Бабурин;
2. Павел Грудинин;
3. Владимир Жириновский;
4. Владимир Путин;
5. Ксения Собчак;
6. Максим Сурайкин;
7. Борис Титов;
8. Григорий Явлинский.