Ошто үй-бүлөлүк зомбулукту алдын алуу борбору ачылат

Ош шаарына үй-бүлөлүк зордук-зомбулукту алдын алуу борбору ачылат. Бул тууралуу Ош шаарынын вице-мэри Шакир Зулимов менен ЮНИСЕФтин балдарды коргоо боюнча программасынын координатору Елена Зайченконун жолугушуусунда сөз болгонун мэриянын маалымат кызматы кабарлады.

Аталган борбор ачылса, үй-бүлөлүк зомбулукка, турмуштук оор кырдаалга кабылган, ден соолугунун мүмкүнчүлүгү чектелген балдарга жана алардын ата-энелерине ар тараптан көмөк көрсөтүлөт. Андан сырткары, борбор балдарды үй-бүлөдөн ажырап калуусун алдын алуу жана ташталган балдарды кабыл алуучу үй-бүлөлөрдү даярдоо боюнча иштерди аткарат.

Елена Зайченко мэриядан борборду ачууга көмөк көрсөтүүнү суранып, эки тараптуу жүргүзүлгөн бул долбоор ишке ашып калса, балдарды жана ата-энелерди социалдык жактан коргоодогу бир топ маселелер комплекстүү ишке аша тургандыгын кошумчалады.

Белгилей кетсек, Ош шаарындагы ден соолугунун мүмкүнчүлүгү чектелген балдардын ден соолугун калыбына келтирүү борборунда “ата-энелер” бөлмөсү ачылып, 2 жылдан бери кызмат көрсөтүп келет. Андан сырткары, 2017-жылы “Үмүт шооласы” аттуу балдарды убактылуу жайгаштыруу борбору жана “Мөл булак” күндүзгү борбору ачылып, балдарды реабилитациялоо жумуштарын аткарып келүүдө. Бул борборлор Ош мэриясы тарабынан каржыланып келет.