Жакындары ур-токмокко алган 8 жашар кыз ооруканадан балдар интернатына чыгарылат

Бишкек шаарында жакындары тарабынан ур-токмокко алынган 8 жаштагы кыз бүгүн, 19-мартта ооруканадан чыгарылып, балдар интернатына которулат. Бул тууралуу SUPER.KG порталына Аламүдүн райондук социалдык өнүктүрүү башкармалыгынын башчысынын орун басары Тилек Миңбаев билдирди.

Социалдык кызматкердин маалыматына ылайык, балдар интернатынын кароосуна кыздын 10 жаштагы бир тууган агасы да алынат.

"Балдардын өздөрүнүн апасы изделүүдө. Азырынча апасынын бир туугандары гана табылды. Эгер алардын балдарды багууга шарты ылайыктуу болсо балдар тайлары тарабына багууга берилет. Өгөй энеси 1 айга камакка алынып, учурда тергөө иштери жүрүүдө. Ал эми анын 2 жаштагы жана 4 айлык балдары ымыркайлар үйүндө каралууда. Алардын да туулгандыгы тууралуу күбөлүктөрү жок болуп чыкты", - дейт Миңбаев.

Эске салсак, окурман 12-март күнү "Элдик кабар" рубрикасына Бишкекте 8 жаштагы кыз жакындарынан кордук көрүп ооруканага түшкөнүн маалымдаган. Маалыматты Бишкек шаарындагы №3-балдар ооруканасынан тастыкташып, ал колунан, башынын бир канча жеринен, моюнунан жаракат алып, денесиндеги көп тактар менен "Тез жардам" аркылуу келгенин айтышкан. Кийин секелектин "Өгөй апам отургуч менен уруп колум сынды, башыма чөмүч менен чапкылап, күн сайын урат" деген видеосу чыкты. Бул арада SUPER.KG'ге кыздын чоң энеси "Неберем өзү тентек, келинимдин урганына ишенбейм", - деп айткан . Бул боюнча кыздын өгөй апасына кылмыш иши козголуп, убактылуу кармоочу жайга алынган.

Ошондой эле кийин сабалган кыздын сүрөт-видеолорун социалдык тармактарга таратып, жардам чогулткандар анын жакындары эмес, абалды өз кызыкчылыктарына пайдалангандар экени белгилүү болгон. Учурда бул кыздын жакындарынан эч ким жардамга деп акча топтогон жок, жарандарды шылуундарга алданбоого чакырабыз.