Саламаттыкты сактоо министрин сотко беришти

Саламаттыкты сактоо министрлигинин алдында түзүлгөн коомдук байкоочу кеңешинин төрагасы Айбар Султангазиев министр Талантбек Батыралиевди сотко берди. Бул тууралуу SUPER.KG порталына Султангазиев өзү билдирди.

Анын айтымында, коомдук байкоочу кеңеш министрликтеги коррупциялык иштерди ачып жаткандыгына байланыштуу өзүнө карата каршы иштер башталган.

"Мен коомдук байкоочу кеңештин төрагалыгына шайланып жаткан учурда Талантбек Батыралиев мага карата маалымат тараткан. Анда менин соттолгонумду, байкоочу кеңешке мүчө болууга татыксыз экенимди айткан. Менин соттолгондугум 1999-жылы жабылган. Биздин мыйзамдарда соттолгону тууралуу маселе жабылган болсо ал факт катары пайдаланылбайт. Мен бардык мамлекеттик кызматтарда иштей берсем болот, менин ишим "соттолгон эмес" деп чечилген.

Бул маселелер чыгып жатканынын себеби - биз, байкоочу кеңеш көптөгөн коррупциялык иштерди ачып чыкканбыз. Бул иштер министрге жакпай ошол себептен мага карата ушундай аракет көрүлүп жатат.

Мен Биринчи Май райондук сотко Батыралиев ар намысыма шек келтиргени үчүн менден кечирим сурап жана 100 миң сом айып пул төлөп берүүсүн талап кылган арыз менен кайрылдым. Биринчи отурум качан болору чечиле элек, күтүп жатабыз", - дейт Султангазиев.