Жалал-Абад. Облуста азык-түлүк коопсуздугун сактоо аракеттери улантылууда

2012-жылдын 19-ноябрына карата Мамлекеттик материалдык резервдер фондусунан Жалал-Абад облусуна 584,68 тонна I сорттогу, 60,95 тонна II сорттогу, бардыгы болуп 645,63 тонна ун алынып келинди. Бул тууралуу өкмөттүн Жалал-Абад облусундагы ыйгарым укуктуу өкүлүнүн басма сөз кызматы билдирет. Маалыматка ылайык, келген ундан 460,42 тонна I сорттогу, 7,15 тонна II сорттогу ун сатылды. Азыркы учурда 178,06 тонна ун бар. Мамлекеттик материалдык резервдер фондусу аркылуу Жалал-Абад облусунун район-шаарларына ун алынып келүү улантылууда. Ал эми Чаткал районуна “Акун” фирмасынан унду килограммын 26 сомдон жалпы 500 тонна жеткирүү боюнча иш алып барылып, азыркы учурда 20 тонна ун жеткирилди. Тогуз-Торо районуна Мамлекеттик материалдык резервдер фондусунан 100 тонна ун бөлүнүп, анын 50 тоннасы "Кыргыз алтын" ААКнын транспорттук каражаттары менен жеткирилип, жеринде сатылууда.