Күрөш боюнча Азия чемпиондору Акжол Махмудов жана Муслим Евлоев 2 миң доллар сыйлыкка ээ болду

Кыргыз Республикасынын күрөш федерациясы Бишкек шаарында өткөн күрөш боюнча Азия чемпиондугунун жеңүүчүлөрүн жана 2017-жылы эл аралык мелдештерде ийгиликке жетишкен спортчуларды акчалай сыйлык менен сыйлады.
Азия чемпиондугун багындырган балбандар Акжол Махмудов жана Муслим Евлоев федерациядан 2 миң АКШ долларына ээ болсо, күмүш байге ээлери Жоламан Шаршенбеков, Урматбек Аматов жана Атабек Азизбековдор 1500 АКШ доллары менен сыйланышты. Ал эми Азия чемпиондугунун коло медалдарынын ээлери 1000 доллар акчалай сыйлыктарга ээ болду.

Андан сырткары, күрөш федерациясы 2017-жылы мыкты жыйынтык көрсөткөн балбандарга да акчалай сыйлыктарды ыйгарды. Алардын арасында Азия оюндарынын чемпиону Калы Сулайманов, жыл ичинде 7 байге уткан Айсулуу Тыныбекова баштаган бир катар балбандар жана алардын машыктыруучулары бар.