Бүгүн футбол боюнча Кыргыз улуттук курамасы Мьянма менен Түштүк Кореяда беттешет

Футбол боюнча Кыргыз улуттук курамасы бүгүн, 22-мартта Түштүк Кореянын Инчон шаарында Мьянма курамасы менен беттешет. Ал 2019-жылы орун ала турган Азия кубогуна тандоо турунун алкагында өтөт. Оюн Бишкек убактысы менен саат 12:00дө башталат. Эки команда буга чейин 2 ирет кез келип, 2014-жылы Кыргыз курамасы Владимир Верёвкин киргизген гол менен 1:0 эсебинде жеңишке жетсе, 2017-жылы 10-октябрда 2:2 эсебинде тең чыккан.

Мындан сырткары, эртеңки Мьянма курамасы жана 27-мартта Индия курамасы менен кез келчү оюндарга катыша турган 23 Кыргыз футболчунун ысымы белгилүү болду. Алар:

Дарбазачылар: Павел Матяш (“Алмалык”, Өзбекстан), Валерий Кашуба (“Дордой”), Калыс Акималиев (“Абдыш-Ата”).

Коргоочулар: Азамат Байматов (“Борнео”, Индонезия), Курсанбек Шератов, Тамирлан Козубаев, Бахтияр Дүйшөбеков, Аскарбек Салиев, Авазбек Откеев, Дэниэл Тэго (баары – “Дордой”), Аманбек Маныбеков (“Абдыш-Ата”).

Жарым коргоочулар: Павел Сидоренко, Азиз Сыдыков, Ислам Шамшиев, Муролим Ахмедов, Кайрат Жыргалбек уулу (баары – “Дордой”), Фархат Мусабеков (ФЦ), Антон Землянухин (“Атырау”, Казакстан), Эдгар Бернхардт (“Тычи”, Польша).

Чабуулчулар: Мирлан Мурзаев (“Серик Беледиеспор”, Турция), Виталий Люкс (“Унтерхахинг”, Германия), Бекжан Сагынбаев, Кадырбек Шаарбеков (“Дордой”).

Эске салсак, окуу-машыгуу жыйынына 27 футболчу чакырылган. Алардан Германиянын “Виденбрюк” клубунун оюнчусу Виктор Майер жаракатынан улам келбей калды. Ал эми Ильяз Алимов, Одилжон Абдурахманов (“Алай”), Сүйүнбек Мамыралиев жана Азим Азаров ("Дордой”) машыгуулардан өтпөй калган.