Аксыда кайнене-келинди өлтүрүүгө айыпталган адам өмүр бою эркинен ажыратылды

Аксыда кайнене-келинди өлтүрүүгө айыпталып кармалган адам сот тарабынан күнөөлүү деп табылып, өмүр бою эркинен ажыратылды. Бул тууралуу Жогорку Соттун басма сөз кызматынан билдиришти.

Маалыматка ылайык, кайнене-келинди өлтүрүүгө айыпталып жаткан 30 жаштагы А.Б. аттуу адамдын иши 19-мартта каралган. Анда сот аны күнөөлүү деп таап, күчөтүлгөн режимде өмүр бою эркинен ажыратуу чечимин чыгарган.

Эске салсак, 2017-жылы 15-ноябрда Жалал-Абад облусунун Аксы районуна караштуу Авлетим айыл аймагынын Коргон айылында кайнене менен келиндин жансыз денелери табылгандыгы тууралуу маалыматты милициядан билдиришкен. Андан тышкары кылмыш жасалган үйдө маркум аялдын 26 жаштагы кызы дагы оор абалда жаракат алып ооруканага түшкөндүгү маалым болгон.

Кийин аталган кылмышка шектелип ооруканада жаткан 26 жаштагы кыздын жигити кармалып, соттун чечими менен 2 айга камакка алынган.