Кыргыз паспортун мыйзамсыз алган 4 Кытай жаранына жана паспорт берген жетекчиге карата кылмыш иши козголду

Кыргыз паспортун мыйзамсыз алган 4 Кытай жаранына жана паспорт берген жетекчиге кылмыш иши козголду. Бул тууралуу бүгүн, 24-мартта SUPER.KG порталына Ош ОИИБинин басма сөз катчысы Жеңишбек Ашырбаев билдирди.

Маалыматка ылайык, мыйзамсыз документтерди жасаганы үчүн Ноокат районунун Жаңы-Базар айылынын паспорт бөлүмүнүн 57 жаштагы жетекчиси менен Өзгөн районунун 39 жаштагы тургунуна карата кылмыш иши козголду.

"2017-жылдын ноябрь айында Ош облусунун ички иштер башкармалыгынын кызматкерлери тарабынан Кара-Суу районундагы "Туратали" базарында рейд өткөрүп, соодагерлердин паспортун текшергенде, уйгур экенине карабастан өзүн Кыргыз жаранымын деп айтып кыргыз паспортун көрсөткөн. Паспортторду иликтеген учурда алардын бири Ноокат районунун Рахманов, дагы бири Өзгөн районунун Ражапов аттуу жашоочуларынын атына жазылган жана мыйзамсыз даярдалган паспорттор экени белгилүү болгон. Учурда Кытай жарандарынын бири Бишкектен, экинчиси Оштон кармалды. Дагы экөөсү изделүүдө. Кармалгандар сурак учурунда жасалма паспорт үчүн 2-3 миң доллар төлөгөнүн билдиришти", - дейт Ашырбаев.

Маалымат боюнча учурда Ош облусунда 15 миңге жакын Кытай жарандары эмгектенип жүрөт.