Кара-Сууда 80 жаштагы карыяны сүзүп качып кеткен айдоочу кармалды

Кара-Сууда 80 жаштагы карыяны сүзүп качып кеткен айдоочу кармалды. Бул тууралуу бүгүн, 24-мартта SUPER.KG порталына Ош облусунун жол кыймылынын коопсуздугун камсыздоо башкы башкармалыгынын тескөөчүсү Алтынбек Теңизбаев билдирди.

Анын айтуусуна караганда, кылмышка шектүү катары каза болгон жарандын айылдашы кармалган.

"80 жаштагы карыяны сүзүп кеткенге шектүү катары кечээ, 23-мартта саат 21:00 чамасында Кара-Суу районунун Жаңы-Арык айылынын 45 жаштагы тургуну Ниссан Примера үлгүсүндөгү унаасы менен кармалды. Ага карата кылмыш иши козголуп, унаасы айып аянтчасына токтотулуп тийиштүү экспертизалар тартылды. Учурда тергөө амалдары жүрүп жатат", - дейт Теңизбаев.

Эске салсак, окуя 22-март күнү Кара-Суу районунун Жаңы-Арык айылында болгон. Анда 80 жаштагы карыяны унаа сүзүп, ал ошол жерден жан берген. Ал эми айдоочу кырсык болгон жерден качып кеткен.