Орусияда соода борборунан чыккан өрттөн 37 адам каза болду

Орусиянын Кемерово шаарындагы өрттөн 37 адам каза болду. Бул тууралуу орусиялык басылмалар жазып чыгышты.

Маалыматка ылайык, өрт кечээ, 25-мартта Кемерово шаарындагы "Зимняя вишня" аттуу соода борборунун 4-кабатынан чыккан. Кийин өрт балдар аянтчасы менен кинотеатрды каптаган. Анын кесепетинен 37 адам курман болгон, алардын тогузу жаш балдар экени айтылууда.

Андан сырткары, 36 адам өрттүн кесепетинен ар кандай жаракаттарды алып ооруканага түшкөн. Дагы 64 адам дайынсыз болуп жатканы жазылууда. Басылмалардын маалыматына ылайык, алардын кырк бири балдар.

Тилсиз жоо Бишкек убактысы боюнча саат 19:00дөр чамасында башталып, түндө саат 2лер чамасында толук өчүрүлгөн.

Ал эми Кыргыз Республикасынын Тышкы иштер министрлигинен аталган өрттөн жабыркагандардын арасында Кыргыз жарандары бар же жок экенин тактоо иш-аракеттери жүрүп жатканын кабарлашты.