Кытайда дарыгерлер 11 жаштагы баланын 3-бутун операция жолу менен алышты

Кытайда дарыгерлер 11 жаштагы баланын 3-бутун операция жолу менен алышты. Бул тууралуу чет элдик маалымат каражаттары жазып чыгышты.

Маалыматка ылайык, Кытайдын түндүк-батышында жайгашкан Синьцзянь автономдук районунда жарык дүйнөгө келген Сяо аттуу балага операция жасалып, анын ашыкча 3-буту алынган.

Белгилүү болгондой, операция Шанхайдагы коомдун саламаттыгын сактоо клиникасында жасалып 10 саатка созулган. Сяонун ашыкча мүчөсү анын аягына чейин өрчүбөй калган эгизиники болгон.

"Мен баламдын ашыкча мүчөсү бар экенин билген эмесмин. Анткени биз алыскы айылда жашагандыктан дарыгерлердин көзөмөлүндө болууга мүмкүнчүлүк болгон эмес. Сяо төрөлгөндөн тарта өлкөнү кыдырып операция жасап берчү дарыгерлерди издеп келгенбиз. Эми минтип балабызга операция жасалып отурат", - деп билдирген баланын апасы.

Хирург баланын абалын оор деп баалаган. Буга карабастан Сяого жасалган операция ийгиликтүү өткөн. Ашыкча мүчөсүнөн сырткары Сяо жүрөк кемтиги менен төрөлгөнүн дарыгерлер аныкташкан.

Оорукананын башчысынын айтымында, Сяо эми башка балдардай эле өмүр кечире алат.