"Евровидение" сынагынын эң алгачкы жеңүүчүсү Лиз Ассия каза болду

24-мартта белгилүү швейцариялык ырчы, "Евровидение" ыр сынагынын эң алгачкы жеңүүчүсү Лиз Ассия 94 жаш курагында каза болду. Бул тууралуу чет элдик басылмалар жазып чыгышты.

Маалым болгондой, ал 1956-жылы жогоруда аталган сынакка "Refrain" аталышындагы чыгармасы менен катышып, жеңүүчү аталган. Андан соң 2 жыл катары менен кайрадан катышып, 1957-жылы 8-орунга ээ болсо, 1958-жылы "Giorgio" аталышындагы ырды аткарып, 2-орунду ээлеген.

Лиз Ассия 1924-жылы Швейцарияда туулган. Карьерасын алгач бийчи катары баштап, андан соң ырчылыкка киришкен. 2005-жылы "Евровидение" сынагынын 50 жылдыгына арналган кечеде ырдаган. 87 жашында кайрадан өз өлкөсүнүн атынан аталган сынакка катышып көрүүнү чечкен. Бирок өлкөдөгү тандоо турунан өтпөй калган.