Уурдалган акчанын бир бөлүгүн милиция кызматкерлери уурдап алышкан деп шектелип жатышат

Башкы прокуратура Ош ШИИБинин кызматкерлерине шектүүнүн үйүнөн табылган акчанын бир бөлүгүн өздөрүнө алып алышкан деп кылмыш ишин козгоду. Бул тууралуу Башкы прокуратуранын басма сөз кызматынан билдиришти.

Маалыматка ылайык, 16-январда Ош ШИИБинин кызматкерлери каракчылык фактысы боюнча шектүүнүн үйүндө тинтүү иштерин жүргүзүп, ири көлөмдөгү акча табышкан. Кийин белгилүү болгондой, милиция кыматкерлери табылган акчадан 1 миллион 740 миң сомду өздөрүнө алып алышкан. Бул аракеттерин жашыруу үчүн шектүүлөрдүн биринин жакынын мыйзамсыз кармашып, шектүү алардын талабына көнгөн соң гана коё беришкен.

Бул факты боюнча Башкы прокуратура тарабынан 304-берене(кызматтык абалынан кыянаттык менен пайдалануу) жана 315-берене (кызматтык жасалмачылык) менен кылмыш иши козголуп, тергөө иштерин жүргүзүү үчүн УКМКга өткөрүлүп берилген.