Өзбекстан төрөт үйүндө шаан-шөкөт уюштургандар менен күрөшө баштады

"Өзбекстандын Саламаттыкты сактоо министрлиги төрөт үйүнөн баланы чыгаруудагы шаан-шөкөттү токтотуу менен күрөшүүдө. Учурда жаш үй-бүлөлөргө, төрөт үйүнүн дарыгерлерине түшүндүрүү иштери жүргүзүлүп, баланы үйгө алып чыгуудагы салтанаттарды токтотуу боюнча бир катар иш-аракеттерди аткаруу пландалууда", - деп жазылат жергиликтүү маалымат басылмаларында министрдин билдирүүсүнө таянып.

Анда белгиленгендей, акушер-гинекологдорго, үй-бүлөлүк дарыгерлерге, медайымдарга жана төрөт алдындагы энелерге баланы төрөт үйүнөн үйгө алып чыгууда уюштурулган салтанаттын зыяндуулугу түшүндүрүлүүдө.

"Баланы төрөлгөндөн кийин 40 күнгө чейин көпчүлүктүн арасында алып жүрүү анын ден соолугуна зыян алып келиши мүмкүн. Баланын саламаттыгы үчүн анын үйгө кандай унаа менен алынып келгендиги, кандай "каармандар" аны тосуп алгандыгы жана ал төрөт үйүнөн чыгып баратканда кандай оркестр ойногондугунун такыр мааниси жок", - деген саламаттыкты сактоо министри Алишер Шадманов.