Александр Крестинин: "Индия менен боло турган беттеште толук күчүбүз менен ойнойбуз"

Кыргыз-Индия беттешинде Кыргыз курама командасы толук күчү менен ойнойт. Бул тууралуу бүгүн, 26-мартта маалымат жыйында футбол боюнча Кыргыз курама командасынын башкы машыктыруучусу Александр Крестинин билдирди.

Анын айтымында, Кыргыз курама командасы келе жаткан беттешке толугу менен даяр жана бул беттеште толук мүмкүнчүлүгүн көрсөтүп ойнойт.

"Алгач бардыгын Азия Кубогуна аттанганыбыз менен куттуктайм. Бул жыйынтык кокустан болгон жок. Биз 3 жылдан ашуун убакыттан бери тажрыйбалуу оюн көрсөтүп келе жатабыз. Азия Кубогуна өттүк, бирок Индия менен боло турган беттеште толук күчүбүз менен ойнойбуз. Эртеңки беттешке чейин даярданууга убакыт бар, бул убакытты туура пайдалануу керек. Айтып кетсем биздин команда толугу менен түзүлө элек, биз жаңы өнүгүп келе жатабыз. Учурда белгиленген деңгээлге чейин жеттик, бул белгиден ылдый түшпөй, алдыдагы ийгиликтерди багынтуу керек. Ошондой эле 2017-жылы биздин курама өз талаабызда аз оюн көрсөттүк. Дөлөн Өмүрзаков стадионундагы маанайды бардыгыбыз сагындык", - деп айтты Крестинин.

Айта кетсек, Индия курама командасынын машыктыруучусу Стефан Константин беттештен жеңиш үчүн болгон аракеттерин көрүп жатышканын айткан. "Биз бул жерге жеңилүү үчүн келген жокпуз. Эки команда тең чыкты, тапшырма аткарылды. Бул оюн Азия Кубогуна даярдык катары бааланат жана даярданууну бул оюн менен баштайбыз. Улуттук курама команда ойноп жатканда утулуу дегенди ойлобоо керек", - деп билдирген.

Белгилей кетсек, Азия Кубогунун тандап алуу оюндарынын алкагында Кыргыз-Индия беттеши эртең, 27-мартта саат 20:00дө башталат.