Футбол боюнча Кыргыз-Индия беттешин арабиялык калыстар тейлейт

Бүгүн, 27-мартта Азия Кубогунун тандап алуу оюнунун алкагында өтө турган Кыргыз-Индия беттешин Бириккен Араб Эмираттарынын калыстары тейлейт. Бул тууралуу SUPER.KG порталына Кыргыз Республикасынын футбол федерациясы билдирди.

Аталган беттештин башкы калысы Алжнеиби Аммарали Абдулла болот. Анын жардамчылары катары Альрашди Ахмед Саид Манкамал жана Зайед Давуд Салман болушмакчы. Ал эми резервдеги рефери кызматын Камал Альхаммади Юсуф Хасан аркалайт.

Белгилей кетсек, Кыргыз-Индия беттеши Дөлөн Өмүрзаков атындагы стадиондо өтөт. Оюн Бишкек убактысы боюнча 20:00дө башталат.

Айта кетсек, Кыргыз жана Индия курамалары тандап алуу оюндарынын 2-турунун алкагында Индиянын Бенгалор шаарында кез келишкен. Анда оюндун жыйынтыгында Индия курамасы 1:0 эсеби менен жеңишке жеткен.

Кыргыз жана Индия курамалары 2019-жылы Бириккен Араб Эмираттарында өтө турган Азия Кубогуна жолдомолорду камсыздай алышкан. Кыргыз курамасы жолдомону 5-турда Мьянма курамасын 5:1 эсебинде жеңип камсыздаса, Индия курамасы 4-турда Мьянма курамасы менен 2:2 эсебинде беттешип, 13 упай менен жолдомого ээ болгон.

Кечээ, 26-мартта Кыргыз-Индия беттешинин алдындагы маалымат жыйында Кыргыз курама командасынын башкы машыктыруучусу Александр Крестинин беттешке даяр экенин билдирип, Кыргыз курамасы толук күчү менен ойной турганын айтса, Индия курамасынын башкы машыктыруучусу Стефан Константин беттештен жеңиш үчүн болгон аракеттерин көрүп жатышканын айткан.