Политехтин мушташкан мугалимдери жумуштан бошотулду

Исхак Раззаков атындагы Кыргыз мамлекеттик техникалык университетинин мугалимдери окуу жайда чатакташып, милицияга арыз менен кайрылгандардын ишин мугалимдерден түзүлгөн комиссия иликтеп, жыйынтык чыгарды. Комиссиянын жыйынтыгы менен кафедра башчысы жана окутуучу жумуштан бошотулду. Бул тууралуу аталган окуу жайдын басма сөз кызматы SUPER.KG порталына билдирди.

"Мугалимдердин окуу жайда спирт ичимдигин ичип, жаңжалдашкандары боюнча атайын комиссия түзүлгөн. Мугалимдерден түзүлгөн комиссиянын жыйынтыгы менен жумуш учурунда спирт ичимдигин ичкен кафедра башчысы менен окутуучу жумуштан айдалды. Ал эми деканга сөгүш берилди", - дейт басма сөз кызматы.

Эске салсак, буга чейин "Медиа-порталдын" "Элдик видео" бөлүмүнө "Мугалимдер окуу жайда мас болуп жүрүшөт" деген аталыштагы видео жүктөлгөн.

Видеону тартып алган мугалим SUPER.KG порталына: "Кафедра башчысынын кабинетинде майрамдап жатканын видеого тартып алганым үчүн анын аспиранты мени сабап салды. Кабинетте ошол аспирант экөө ичип отурушкан", - деп билдирген эле.