Улан Примов ЖЭБге байланыштуу түзүлгөн депутаттык комиссия кийинки аптада иликтөөсүн аягына чыгара турганын айтты

КСДП фракциясынан депутат Улан Примов ЖЭБге байланыштуу түзүлгөн депутаттык комиссия кийинки аптада иликтөө жыйынтыгын аяктай турганын айтты. Бул тууралуу ал бүгүн, 28-мартта Жогорку Кеңештин жыйынында билдирди.

Анын айтымында, аталган депутаттык комиссия 6 жолу отурум өткөргөн. "Комиссия ырааттуу жана калыс иш алып барып жатат. Көптөгөн документтерди топтоду", - дейт ал.

Жыйындын башында "Республика-Ата Журт" фракциясынан депутат Курманкул Зулушев депутаттык комиссия иликтөөнүн жыйынтыгын тез арада чыгаруусу керектигин айткан.

Эске салсак, 26-январда Бишкек ЖЭБинде авария болуп, шаардагы үйлөргө берилген жылуулук 7 күнгө төмөндөгөн. 386 миллион долларлык ЖЭБдин курулушу, ЖЭБдеги авария, өкмөттүн күз-кыш мезгилине даярдыгын иликтеп чыгуу боюнча парламентте депутаттык комиссия түзүлгөн.

Депутаттык комиссиянын курамына төмөнкүлөр кирет:

"Өнүгүү-Прогресс" фракциясынан - Исхак Масалиев;

КСДП фракциясынан - Төрөбай Зулпукаров, Данияр Аттокуров, Аида Касымалиева, Улан Примов, Аалы Карашев;

"Бир Бол" фракциясынан - Мыктыбек Абдылдаев;

"Ата Мекен" фракциясынан - Сайдулла Нышанов;

"Республика-Ата Журт" фракциясынан - Айбек Алтынбеков, Акылбек Жамангулов, Умбеталы Кыдыралиев;

"Кыргызстан" фракциясынан - Исланбек Сарсейитов, Алмазбек Токторов.