Коомдо кызуу талкуу жараткан Сүймөнкул Чокморовдун эстелиги азырынча алынбайт

Коомдо көптөгөн талкууну жараткан Сүймөнкул Чокморовдун эстелиги азырынча алынбайт. Бул тууралуу Сүймөнкул Чокморов атындагы коомдук фонддун жетекчиси Сагынбек Абдрахманов билдирди.

Кыргыз киносунун тарыхында “Эң мыкты актёр” наамын 4 жолу алган белгилүү сүрөтчү, СССРдин эл артисти Сүймөнкул Чокморовдун айкелинин ачылышы 2017-жылдын 9-ноябрында болуп өткөн. Айкел борбор калаадагы "Ала-Тоо" кинотеатрынын жанына орнотулган. Эстелик орнотулган соң ал актёрго такыр эле окшошпой калгандыгы тууралуу социалдык тармактардын колдонуучулары жазып чыгышып, кызуу талкууга алынган.

"Чокморовдун эстелиги ачылгандан кийин аны тааныгандар, туугандары, достору, талантын урматтаган адамдар келип айкел окшошпой калганын айтып башташкан. Алар эстелик башка кишиге жасалгандай эле такыр окшоштук болбой жатканын айтып кайрылышкан. Азыркы тапта эстеликти алуу боюнча Бишкек шаардык мэриясы менен сүйлөшүүлөр болуп жатат", - деп билдирди Абдрахманов.

Айкелдин салмагы 600 килограмм, ага атайын каражаттар менен эски эстеликтей түс берилген. Мындай эстеликтер Кыргыз өлкөсүндө аз гана санда. Айкелчи Алмаз Кожокуловго таандык бул айкел бир жылдын ичинде орусиялык "Дубровин" ишканасы тарабынан даярдалган.