III Дүйнөлүк көчмөндөр оюндарына сатылчу билеттерге 2 миллион сомдон ашык акча коротулат

III Дүйнөлүк көчмөндөр оюндарына сатылчу билеттерге 2 миллион сомдон ашык акча коротулат. Бул тууралуу мамлекеттик сатып алуулар порталы кабарлайт.

Мамлекеттик Жаштар иштери, дене тарбия жана спорт агенттигинин колдоосу менен "Этномаданиятты жана ат оюндарын өнүктүрүү борбору" III Дүйнөлүк көчмөндөр оюндарына сатылчу билеттерди жасоого жана сатууга тендер жарыялады. Жалпы 23 миң билет жасатууга 2 миллон 93 миң сом бөлүнгөн. Тендердин жеңүүчүсү оюндардын ачылышына жана жабылышына 11 миң 500дөн билет даярдоосу керек.

Каржы минстрлигинин билдиргенине ылайык, III Дүйнөлүк көчмөндөр оюндарын өткөрүүгө 306 миллион 300 миң сом жумшоо пландалууда.

Анын ичинен иш-чараны даярдоо үчүн Маданият, маалымат жана туризм министрлигине 175 миллион, ал эми Жаштар иштери, дене тарбия жана спорт мамлекеттик агенттигине 132 миллион 200 миң сом каражат берилет. Анда белгилүү болгондой, Бүткүл дүйнөлүк көчмөндөр оюнунун секретариатын каржылоого 3 миллион 600 миң сом каражат каралган.

Эске салсак, 2016-жылы II Бүткүл дүйнөлүк көчмөндөр оюнун өткөрүүгө кеткен чыгымдар 3 миллиард сомдон ашкан. Анда Ысык-Көлдүн Чолпон-Ата шаарына жаңы ат майданы курулуп, Балыкчы-Корумду унаа жолдору оңдоп-түзөө иштеринен өткөн.

Ал эми 2014-жылы Бүткүл дүйнөлүк көчмөндөр оюну Кыргыз өлкөсүндө биринчи жолу өткөрүлүп, ага мамлекеттик бюджеттен 102 миллион 130 миң сом каражат жумшалган.