Жергиликтүү тургун: "Алайкууда кечээтен бери жарык жок отурабыз, жол да жабылып калган"

Кара-Кулжа районунун Алайкуу өрөөнүндө 28-марттан бери кар жаап, кардын калыңдыгы алыскы Көк-Арт айылында 40 сантиметрге жетти. Аталган айылдын Замирбек Аккозуев аттуу тургуну өрөөндүн тургундары 28-марттан бери жарыксыз калышканын SUPER.KG'ге айтып берди.

"Кар жаңы гана токтоду. Бирок кечээ кечинде жарык өчүп калган, азыркыга чейин бериле элек. Район борборуна кеткен жол да жабылып калыптыр. Андан сырткары малдар үчүн кышкы убакытка камдаган чөптөрүбүз да аз калган болчу. Мындан улам малдарды талаага айдап жатканбыз. Кар жаап коюп, азыр үйдө багууга туура келип жатат. Тийиштүү кызматтардан эч ким жардамга келе элек", - деди айыл тургуну.

Белгилей кетсек, буга чейин Өзгөчө кырдаалдар министрлиги Алайкууда жарык өчпөгөнүн жана унаа жол ачык экендигин кабарлаган эле.