Дастан Бекешев: "Эл депутатты "KG" номеринен эмес, кылган ишинен таанышы керек"

Эл депутатты "KG" номеринен эмес, кылган ишинен таанышы керек. Мындай пикирин SUPER.KG порталына депутат Дастан Бекешев билдирди.

Депутаттын пикиринде бул эскирген көрүнүш, мындай нерсени архаизм деп атоого болот.

"Мен "KG" номерин жоюуда өзүм демилгечи болгом, ошол эле пикиримди карманам. Бизге анын эч кандай пайдасы жок, эл депутаттарды "KG" номеринен эмес, кылган иши менен тааныйт да. Жеке өзүмдө жолугушууларда, көчөдө номерге байланышкан көйгөйлөр болгон эмес. Бул номердин пайдасынан зыяны көп деп айтууга болот. Бизде ансыз деле мекемелерге таандык номерлер көп, ошолорду да жоюш керек. "KG" номерин тагып алсаң жол көзөмөлдөгөн кызматкерлер да коркуп тоспой коюшу мүмкүн. Ошондуктан бул номердин кереги жок, терс жагдайларды жаратат", - деди Бекешев.

Айта кетсек, бүгүн, 29-мартта Жогорку Кеңештин жыйынында депутат Тазабек Икрамов өкмөткө кайрылып, "KG" номерин депутаттарга кайра бербесеңер, эл тааныбай же болбосо көчөдөн ар кандай тоскоолдуктар жаралышы мүмкүн экендигин айткан.