Мамкаттоо кызматы чиновниктер менен депутаттар унааларында кандай номер колдонорун билдирди

Өкмөт мүчөлөрү да, депутаттар да унааларында бирдей эле кызматтык номер колдонот. Бул тууралуу 29-мартта SUPER.KG порталына Мамлекеттик каттоо кызматынын басма сөз кызматынан билдиришти.

"Мурда "KG" номерлери бар болчу, кийин өзгөртүүлөр киргизилип, ал номерлер жок кылынган. Бир гана президентке таандык 01 KG номери калтырылган. Учурда өкмөт мүчөлөрү да, депутаттар да бирдей эле кызматтык номер менен жүрүшөт. Жарандар колдонгон номерден кызматтык номерлердин айырмасы тамгасында гана бар. Өкмөт мүчөлөрү жана депутаттар колдонгон номерде 2 гана тамга жазылса, жалпы жарандар колдонгон номерлерде 3 тамга жазылган", - дешти мекемеден.

Айта кетсек, 29-мартта Жогорку Кеңештин жыйынында депутат Тазабек Икрамов өкмөткө кайрылып, сапарга чыкканда көчөдөн кыйынчылыктар жаралбашы үчүн депутаттардын унааларында кызматтык номер болушу керектигин же болбосо өкмөт мүчөлөрү да жөнөкөй номер менен жүрүшсүн деген пикирин билдирген.