Египеттеги президенттик шайлоодо учурдагы өлкө башчы 92 пайыз менен алдыда баратат

Египетте өткөн президенттик шайлоонун алдын ала жыйынтыктары боюнча учурдагы президент Абдул Фаттах ас-Cиси 92 пайыз менен алдыда бара жатат. Бул тууралуу чет элдик маалымат булактары жазууда.

Маалыматка ылайык, Египетте президенттик шайлоо 26-28-март күндөрү өткөн. Ал эми шайлоонун расмий жыйынтыгы 2-апрелде жарыяланат. Өкмөттү сындаган күчтөр шайлоо алдында президентке атаандаш болчулар камалып, жарыш атаандаштык жок өткөнүн билдирген.

Мурда Египеттин армиясында кол башчылык кылган Абдул Фаттах ас-Cиси 2013-жылы аскердик төңкөрүштөн кийин бийликке келген. Анын колдоочулары ас-Cиси өлкөдө туруктуулукту орнотуп, мамлекеттүүлүктү сактап калды дешсе, каршылаштары ал бийликке келген күндөн тартып, сөз эркиндигине, бийлик оппоненттерине карата басым күчөгөнүн айтып келишет.