Бишкекте 18 кабаттуу үйлөргө ылайыкталган бир эле өрт өчүрүүчү машина бар

Бишкекте 18 кабатка чейинки көп кабаттуу үйлөргө ылайыкталган бир эле өрт өчүрүүчү машина бар. Бул тууралуу бүгүн, 30-мартта Жогорку Кеңештеги КСДП фракциясынын жыйынында өзгөчө кырдаалдар министринин орун басары Калыс Ахматов билдирди.

Жыйынга катышкан депутаттар акыркы учурда борбор калаада 18 кабатка чейин жеткен бийик имараттар көп курулуп жатканын айтып, бул жагдайга көңүл бурулушу керектигин айтышты. Биринчи вице-премьер-министр Аскарбек Шадиев Кыргыз-Кытай өкмөттөр аралык комиссиясы өрткө каршы күрөшүү кызматына жардам алуу боюнча жумуштарды жүргүзүп жатканын белгиледи.

"Кызматтын техникалык абалы төмөн. Акыркы жолу бул кызматка техникалар 2008-2009-жылдары аланган", - деди Шадиев. Ал эми өзгөчө кырдаалдар министринин орун басары Калыс Ахматов май айында Өрткө каршы күрөшүү кызматына 1600 даана атайын форма алына турганын билдирди.

"Мурда Өрткө каршы күрөшүү кызматы өзүнчө мекеме болчу. Бул мекеме ӨКМге кошулганден бери 4 ай өттү. Ушул жылдын май айына чейин 1600 даана атайын форма алып берилет", - деди Ахматов.