Момбеков чиновниктерге: "Сүйлөгөндөн башка эч нерсени билбейсиңер, силерди "сармерденге" жибериш керек"

"Сүйлөгөндөн башка эч нерсени билбейсиңер, силерди "сармерденге" жибериш керек" деп бүгүн КСДП фракциясынын жыйынында депутат Рыскелди Момбеков өкмөт мүчөлөрүнө кайрылды.

Эл өкүлү чиновниктерди сындап, өкмөттүн ишинде натыйжа болбой жатканын айтты. "Экологиялык коопсуздук боюнча бир да маалыматка канааттанган жокмун. Урматтуу депутаттар, мен өкмөттүн маалыматтарын канааттандыруусуз деп табууга сиздерди да чакырам. Азыр эң ири мафия таштанды таштоочу жайларда. Ишкерлер депутаттарды артынан ээрчип аймактардагы таштанды таштоочу жайларды ала албай жүрөт. 8 жылдан бери иштеген вице-мэр 35 гектар жерде жаткан Бишкектин таштанды жайына барып көрбөптүр. "Кумтөрдү" 6 миллиард сомго сотко бердик деп шардана кеп кылдык эле, андан кабар жок.

Экология маселесинде жумуштар жүргөн жок. Мамлекет экологияны сактоо үчүн жылына 234 миллион сом коротсо, алардан түшкөн каражат 50 миллион сом. Бул өкмөт мүчөлөрү сөз сураганда 40 мүнөт сурайт. Жасаган иштерин айтса үч мүнөт көптүк кылат. Буларды топтоп эле "сармерденге" жибериш керек", - деп нааразычылыгын билдирди Момбеков.