"ЭЛДИК КАБАРга" жооп: Социалдык кызматкер: "Кайыр сураган лөлү тектүү үй-бүлөнүн балдары биздин эскертүүбүздү тоготпой жатышат"

Ош шаарынын борбордук көчөлөрүнүн биринде болжолдуу 8-9 жаштагы бала кайыр сурап отурган жеринде уктап калган. Бул окуя боюнча Ош шаардык социалдык өнүктүрүү башкармалыгынын башчысы Батина Токобаева буларды билдирди.

"Бул кабарды уккандан кийин биз атайын рейд жүргүздүк. Текшерүү учурунда Кара-Суу районунун Кызыл-Кыштак айылындагы лөлү тектүү үй-бүлөнүн баласы экендиги аныкталды. Биз аларды бир нече ирет кармап, эскертүүлөрдү бергенбиз. Ошондой эле Кара-Суу райондук сотуна бул ишти көзөмөлгө алгыла деп кат жибергенбиз. Бирок лөлү тектүүлөр биздин эскертүүбүздү такыр эле тоготпой жатышат", - дейт ал.

Белгилей кетсек, "Ош шаарында болжолдуу 8-9 жаштагы баланын картон үстүндө уктап калыптыр. Ал кайыр сурап отурганын алдындагы акча салынган кутудан билсе болот. Ошол күнү жамгыр жаап, аба ырайы суук болчу. Баланын жука кийингени жана көчөдө уктап жатканы мени ойго салып жүрдү. Тиешелүү мекемелер, балким, бул баланын жашоосун изилдеп көрөт деген ойдо сүрөтү менен бөлүшүүнү туура көрдүм", - деп SUPER.KG порталына окурман билдирүү жөнөткөн.